 |
Ծնվ. 24.12.1959թ.
ՀՀՇ անդամ.
ԱՄՆ-ում Հայաստանի առաջին դեսպան (1992–1993թթ.).
ՀՀ առաջին մշտական ներկայացուցիչը Միավորված Ազգերի Կազմակերպությունում.
ՀՀ նախկին արտգործնախարար.
2008 թվականի նախագահական ընտրություններում Լեւոն Տեր-Պետրոսյանի կենտրոնական նախընտրական շտաբի պետ.
Ձերբակալվել է 10.03.2008 թ.
Մեղադրվում է ՀՀ Քր.օր. 190/3, 225/3, 300/1 հոդվածներով:
Գործը ուղարկվել է դատարան:
|
| Ալեքսանդր Արզումանյանը Հայաստանի առաջին դեսպանն էր ԱՄՆ-ում (1992–1993թթ.) և ՀՀ մշտական ներկայացուցիչը Միավորված Ազգերի Կազմակերպությունում (1992–1996թթ):
Նա եղել է ՀՀ արտաքին գործերի նախարարը (1996-1998թթ. ), և հրաժարական է տվել ՀՀ նախագահ Լևոն Տեր-Պետրոսյանի հետ:
Հայոց համազգային շարժման անդամ է 1998թ. սեպտեմբերից:
Եղել է Հայոց համազգային շարժման վարչության նախագահ (2000–2002թթ.),
“Արմատ” հասարակական կազմակերպության վարչության անդամ, Հայ-թուրքական հաշտեցման հանձնաժողովի անդամ (հայ և թուրք ականավոր գործիչներից կազմված անկախ խումբ): 2002թ. հուլիսին Հայ-թուրքական հաշտեցման հանձնաժողովը նախաձեռնեց հեղաշրջումային քայլ` հանձնարարելով Նյու-Յորքի Անցումային արդարադատության միջազգային կենտրոնին տալ Հայոց եղեռնի նկատմամբ ՄԱԿ-ի Ցեղասպանության հանցագործության կանխարգելման և պատժման վերաբերյալ կոնվենցիայի կիրառելիության իրավաբանական վերլուծությունը:
Արզումանյանը հանդիսանում է 2006թ. ստեղծված “Քաղաքացիական անհնազանդություն” շարժման հիմնադիրը:
Ա. Արզումանյանը սովորել է Մոսկվայի Պատրիս Լումումբայի անվան համալսարանում, այնուհետև` Երևանի պետական համալսարանի մաթեմաթիկայի ֆակուլտետում: Աշխատել է որպես տեսաբան-մաթեմաթիկոս:
1988թ-ից մասնակցել է Ղարաբաղյան շարժմանը: Ղեկավարել է Հայոց համազգային շարժման տեղեկատվական կենտրոնը, հրատարակել է շարժման տեղեկատվական թերթերը:
2007 թվականի մայիսի 7-ին Ալեքսանդր Արզումանյանին իշխանությունների կողմից փողերի լվացման կեղծ մեղադրանք առաջադրվեց: Հարուցված ապօրինի քրեական գործի ընթացքում Ալեքսանդր Արզումանյանը կալանավորվեց:
Քաղաքացիական հասարակությունը Հայաստանում որակեց իշխանության այս քայլը որպես քաղաքական հետապնդում և Ալեքսանդր Արզումանյանին` որպես քաղբանտարկյալ: Չորս ամիս անց Արզումանյանին ազատ արձակեցին: Սակայն ինչպես ցույց տվեցին հետագա զարգացումները քաղաքական հետապնդումները նրա նկատմամբ շարունակվում են:
| 
