|
|
Հովհաննիսյան Վոլոդյա Աղասինի
ՀԱՅՏԱՐԱՐՈՒԹՅՈՒՆ
Սիրելի հայրենակիցներ.
Այն պահից սկսած, երբ Լեւոն Տեր-Պետրոսյանը հայտարարեց նախագահական ընտրություններին մասնակցելու իր մտադրության մասին, իմ գործունեությունը տնտեսական տեռորի թիրախ է դարձել: Պատճառն այն է, որ ես հանդիսանալով "Այգսերվիս" ՍՊԸ-ի փայատեր եւ տնօրեն, համարձակություն եմ ունեցել զբաղվել գործարարությամբ լինելով ՀՀՇ անդամ, որ պաշտպանել եմ Լեւոն Տեր-Պետրոսյանի թեկնածությունը, ակտիվորեն ներգրավվել եմ նրա ընտրարշավում, իսկ հետո, հարյուր հազարավոր այլ պատվախնդիր ՀՀ քաղաքացիների նման, չեմ հաշտվել խայտառակ ընտրությունների կեղծված արդյունքների հետ:
Մարտի մեկի սպանդից հետո խուզարկություններ են կատարվել իմ տանը եւ "Այգսերվիսի" տարածքում: Բնականաբար չի հայտնաբերվել իրենց փնտրած զենքն ու զինամթերքը, չկա նաեւ որեւէ ապացույց, որ ես ապօրինի որեւէ բան եմ արել ընտրությունների կամ դրանց հաջորդած խաղաղ նստացույցերի ընթացքում: Չնայած դրան ես գտնվում եմ ոչ պաշտոնական հետախուզման մեջ, ստիպված դարձել եմ քաղաքական վտարանդի եւ ակնհայտ է, որ առաջին իսկ հնարավորության դեպքում կձերբակալվեմ: Դրան զուգահեռ, չորս ամսից ավելի ձգձգվող հարկային ստուգումները փաստորեն կազմալուծել եւ սնանկացման եզրին են հասցրել "Այգսերվիսը", որն ի դեպ Հայաստանի 300 խոշոր հարկատուների ցուցակում էր:
Ստեղծված պայմաններում ինձ` անկախ, ազատ եւ ժողովրդավար Հայաստանի ու Արցախի ջատագովիս, ոչինչ չի մնում բացի ներողություն խնդրելուց մեր բազմաթիվ հաճախորդներից եւ հայտարարելուց որ մենք դադարեցնում ենք մեր տնտեսական գործունեությունը` սպասելով օրենքի գերիշխանության վերականգմանը երկրում:
Իսկ պայքարից հանուն իմ երազած Հայաստանի չեմ հրաժարվում եւ դրա համար կանեմ ամեն հնարավորը:
Վոլոդյա Հովհաննիսյան,
քաղաքական վտարանդի,
30.07.2008թ. Թիֆլիս:
|
| Category: Քաղհալածյալ Գ | Added by: armen (2008-06-14)
|
| Views: 2239
|
|
